Дар Донишкадаи политехникии Донишгоҳи техникии Тоҷикистон ба номи академик М.Осимӣ дар шаҳри Хуҷанд се китобхона мавҷуд аст, ки онҳо соли 2010 ташкил гардидаанд. Китобхонаҳо дар факултетҳои муҳандисӣ-технологӣ, технологияҳои рақамӣ ва дар бинои асосӣ ҷойгиранд.

         Дар китобхонаи Донишкада китобҳои анъанавӣ бо теъдоди 160134 нусха (32408 номгуй)  китобҳои дарсиву бадеӣ, илмӣ – тадқиқотӣ, лабораторӣ, дастурҳои таълимӣ–методӣ, монография ва маҷаллаҳои илмӣ барои хонандагон ва китобхонаи рақамӣ бо фонди 69319 адад китобҳои электронӣ бо дастрасии бемаҳдуд барои истифодабарандагон таъсис дода шудааст. Қайд кардан зарур аст, ки дар фонди китобхонаи рақамӣ низ ҳамаи намуди китобҳо барои истифодабарандагон сабт карда шудааст, ки он кафолати дастрасии китобҳои теъдодашон маҳдуд ҳамчун намунаи электрониро таъмин менамояд. Дар Донишкада нисбат ба самаранок роҳандозӣ намудани фаъолияти китобхона аз ҷониби раёсати Донишкада таваҷҷӯҳи махсус зоҳир мегардад. Ҳамасола харидории китобҳои дарсӣ бо пешниҳоди устодони кафедраҳои тахассусӣ ва табъу нашри китобҳои дарсӣ, дастури методӣ ва монографияи устодон далелӣ гуфтаҳои болозикр аст. Масалан, дар соли  2025 ба фонди китобхона бо дастгирии директори Донишкада ба миқдори 1385 нусха китобҳои дарсӣ, таълимиву методӣ ва бадеӣ харидорӣ гардид. Кормандони китобхона пайваста кӯшиш менамоянд, ки барои ҷалби бештари хонандагон ва обунашавии онҳо корҳои тарғиботиву ташфиқотиро ба роҳ мондаанд, ки натиҷаи кори онҳо дар он инъикос меёбад, ки имрӯз дар китобхонаи Донишкада 3075 нафар аъзоён ба қайд гирифта шудаанд.